KUCHING: Perintah Sarawak semampai nentuka sistem pengerai nengeri efisyen sereta engkeman, nyengkaum nagih kuasa autonomi ba sektor pengerai ari Perintah Besai.

Sapit Premier Sarawak, Datuk Amar Profesor Dr Sim Kui Hian madah, rabies mengkang siti isu pengerai ti meseti diperatika seraris enggau pengeran perintah ngangkatka sistem pengerai nengeri.

“Sepemanjai taun 2024, bisi 106 program betuchuk, ngambi lisin enggau nanda mikrocip udah dipejalai nengah kerejasama perintah lokal.

"Ba pengawa nya, bisi 8,491 lisin ukui diberi kelimpah 3,901 mikrocip.

“Kami mega enda minta lisin ukui dibayar, enggau nya nadai kebuah bala mayuh tau irau ke sakit rabies," ku iya.

Iya mansut ke jaku nya ba Pengerami Basa Opis Menteri Pengerai Mensia Mayuh, Pengawa Berumah enggau Perintah Lokal Sarawak (MPHLG) ditu, Hari Dua.

Ba pengerami nya mega, Datuk Amar Profesor Dr Sim madah, Perintah Nengeri bela meratka pengawa nyendia rumah ulih dibeli ngagai rayat.

Ku iya, kenyau ditumbuh ari taun 2022 nyentuk ngagai 2024, Skim Bantu Deposit enggau Bayar Rumah (HDRAS) udah meri pemaik ngagai 1,834 orang meli rumah.

“Rumah ukai semina endur diau, tang siti perengka ke diguna ti mantu nempa komuniti ti lantang.

“Berindik enggau nya, opis menteri megai tanggung pengawa nentuka pemansang ba pengawa berumah dikemujur, lalu disikap enggau infrastruktur ti chukup ungkup pengelantang rayat, " ku iya.

Bela datai Sapit Menteri MPHLG, Datuk Dr Penguang Manggil enggau Datuk Michael Tiang Ming Tee.- EDISI UKAS