KUCHING: Sarawak deka ngenegapka infrastruktur digital enggau pemanah atur mengeri nengah projek ‘Kuching Smart City and Digital Connectivity’ ti dipelaba beungkus RM550 juta.

Projek nya ngena teknologi 'artificial intellegence' (AI), analisis data enggau infrastruktur digital dikena nambah pemanah servis mengeri sereta tikas pengidup rayat.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg bisi datai ngemata pengawa nyain Sempekat Pemereti Ati (MoU) nya di Begunan Kunsil Nengeri (DUN) Sarawak, ditu kena Hari Empat.

Bela datai, Sapit Premier Sarawak, Datuk Amar Profesor Dr Sim Kui Hian, Menteri Utiliti enggau Telekomunikasyen Sarawak, Dato Sri Julaihi Narawi enggau Sekretari Perintah Sarawak, Datuk Amar Mohamad Abu Bakar Marzuki.

Nangkan nya, Menteri Komunikasyen, Datuk Seri Fahmi Fadzil madah, projek nya deka nyengkaum Dewan Bandaraya Kuching Utara (DBKU) sereta sekeda endur bukai lalu nyungkak pemansang infrastruktur digital di Sarawak.

“Projek tu dipelaba beungkus RM550 juta,” ku iya maya dirandau pemberita pengudah pengawa nya.

Ku iya, MoU nya disain entara Opis Menteri Komunikasyen nengah Komiti Besai Komunikasyen enggau Multimedia Malaysia (SKMM) enggau Perintah Sarawak nengah Opis Menteri Pengerai Mensia Mayuh, Pengawa Berumah enggau Perintah Lokal (MPHLG) sereta Opis Menteri Utiliti enggau Telekomunikasyen Sarawak (MUT).

Nitih penerang media SKMM, renggat tumu projek nya deka meri perati ngagai endur Greater Kuching ti nyerangkung DBKU, Kaunsil Mengeri Kuching Selatan (MBKS), Kaunsil Mengeri Padawan (MPP) enggau Kaunsil Mengeri Kota Samarahan (MPKS).

Entara komponen besai projek tu iya nya pemansang pelasar mengeri begulai bepuguka AI enggau data, negap infrastruktur rentayan sereta nyendia Wi-Fi.

Projek nya mega nyengkaum pengawa ngena teknologi digital begembar dikena nyukung langgur, pengawa matau enggau ngatur mengeri ti manah sereta begulai agi. - EDISI UKAS

Pemberita: Jonnie Kiew
Gambar : Ibanez Jeffery Guang